(пачатак навучальнага года ў нядзельнай школе г. Чэрвеня)
Царква «Дабраслаўленне» горада Чэрвень прыкладае намаганні для таго, каб нядзельная школа поўнілася дзецьмі. Дзеля гэтага кожны верасень, напачатку навучальнага года, у царкве ладзіцца свята. Так было і сёлета. 26 верасня 2015 г. дом малітвы адчыніў дзверы для хлопчыкаў і дзяўчат, каб развіць іх інтарэс да Божага Слова.
Дзеці, што прыйшлі на свята, сталі ўдзельнікамі гульні па матывах прытчы пра блуднага сына (Лк.15:11-32). Разам з ім яны ўзялі грошы ды пакінулі бацькоўскі дом. Разам з ім яны змарнавалі ўсё што мелі на пустыя забавы. Разам з блудным сынам дзеці
згаладаліся, шукалі ежу і не маглі атрымаць нават струкоў, якія елі свінні. Нарэшце, разам з блудным сынам дзеці шукалі і знайшлі выйсце – вярнуліся дадому, няздольныя апраўдацца. Але замест асуджэння, дома іх чакалі бацькоўскія падарункі …
Апроч гульні, дзеці наведалі 2 майстэрні з вырабамі, дзе можна было вылепіць фігурку з салёнага цеста і зрабіць драўляную ключніцу.
Дзякуем Богу за бацькоў, што прывялі ці проста адпусцілі сваіх дзяцей на гэтае свята.
Хочацца пажадаць царкве «Дабраслаўленне» рупліва і з любоў'ю працаваць далей, каб захаваць абуджаны інтарэс і развіць жаданне больш глыбока пазнаваць Божае Слова.
Разам з вернікамі чэрвеньскай царквы, свята дапамаглі зладзіць браты і сёстры з мінскай царквы «Абуджэнне».
Войцiк А.