Штогод напачатку восені царква «Дабраслаўленне» г. Чэрвень ладзіць свята для дзяцей – адкрыццё нядзельнай школы. Сёлета яно адбылося ў суботу, 16 верасня і мела фармат аднадзённага лагеру. На свята сабраліся дзеці ўзросту ад 8 да 12 гадоў, пераважна з сем'яў, каторыя не наведваюць царкву.
Дзень быў арганізаваны таксама, як і падчас адкрыцця нядзельнай школы ў Кіраўску. Практыка пацвярджае, што варта трымацца такой схемы ў арганізацыі падобных сустрэч для невялікіх груп дзяцей:
- Знаёмства і Біблейскі ўрок
- Гульня ў працяг тэмы ўрока, пажадана на вуліцы
- Музыкальны ўрок
- Абед
- Вырабы
- Спартыўныя гульні
- Агульны збор і малітва
Свята атрымалася. Дзеці падарылі дарослым цэлае мора непасрэднай радасці і пасмешак. Некаторыя з запрошаных дзяцей неўзабаве прыйшлі на першы ўрок нядзельнай школы ў новым навучальным годзе.
Варта адзначыць, што пастар царквы «Дабраслаўленне» Алег Калеснік не першы год актыўна запрашае знаёмых бацькоў і іх дзяцей у нядзельную школу. Гэтыя высілкі пакрысе пачынаюць даваць свае плады ў выглядзе вучняў, якія не толькі прыходзяць на святы, але і даволі стабільна наведваюць урокі цягам года. У гэтым бачыцца здзяйсненне Біблейскага прынцыпу: «Прасеце, і дасца вам; шукайце, і знойдзеце; стукайцеся, і адчыняць вам; бо кожны, хто просіць, атрымлівае, і, хто шукае, знаходзіць, і хто стукаецца, таму адчыняць» (Паводле Мацьвея 7:7,8).
Хочацца пажадаць сабе і ўсім, хто мае дачыненне да працы з дзецьмі, быць уважлівымі і паслядоўнымі з тымі хлопчыкамі і дзяўчынкамі, каго Гасподзь рэальна дае ў рукі, што рэальна прыходзяць у царкву.
У арганізацыі свята бралі ўдзел браты і сёстры з Чэрвеня і Мінска.
Войцiк А.